Vrasja që ndodhi mesditën e djeshme, ka shtuar frikën nga familjarët e autorit për një hakmarrje të mundshme. Manushaqe Picari, e shoqja e Mexhit Picarit, që vrau me 5 plumba ish-dhëndrin e tij është larguar nga banesa, pasi ka frikë nga hakmarrja. Bashkëshorti i saj dhe vajza janë të arrestuar nga policia, dhe nga frika e hakmarrjes ka vendosur që të largohet nga banesa.
Dje në orën 12:00 bashkëshortët Saliaj do të zhvillonin seancën e radhës të divorcit në Gjykatën e Tiranës. Në pritje të nisjes së saj, palët po pinin kafe në të njëjtin lokal në zonën e ish-Ekspozitës në kryeqytet.
Mexhit Picari, 53-vjeç, ndodhej në tavolinë me vajzën e tij Dhuratën, ndërsa ish-dhëndri Kudret Saliaj dhe avokatin e tij Adriatik Cama në një tavolinë tjetër. Në këtë moment, Mexhit Picari është ngritur nga tavolina, dhe iu është afruar ish-dhëndrit duke e qëlluar me pistoletë. Kudret Saliaj, 41-vjeç, gjeti vdekjen në vendngjarje, ndërsa avokati i tij mbeti i plagosur.
Mexhit Picari ka thënë se krimin e ka kryer për dinjitetin e vajzës, sepse sipas tij, ish-dhëndri e kishte akuzuar pa të drejtë.
