Në fjalën e mbajtur në Kuvend për akuzat për krime lufte ndaj Hashim Thaçit dhe Kadri Veselit, kryeministri Rama i konsideroi si imagjinare akuzat për krime lufte ndaj tyre.
Shefi i qeverisë tha se pretendimet në fjalë, sfidojnë edhe vetë imagjinatën më ekstreme. Ai i cilësoi të akuzuarit si dy figura historike të luftës dhe paqes në Kosovë.
Kreu i qeverisë deklaroi nga foltorja e Kuvendit se liderët e UÇK-së ka 21 vite që akuzohen, por ata tashmë janë vendosur në anën e drejtë të historisë.
“Udhëheqësit e UÇK-së kanë qenë thuajse të tërë të akuzuar për 21 vjet si individë me 2 koka, që nga anë një anë kanë mbrojtur luftën çlirimtare dhe nga ana tjetër kanë ngrënë njerëz, kanë ngrënë fëmijë, kanë ngrënë romë si kanibalë.
Përballë historisë, as Thaçi, as Veseli, as Haradinaj dhe asnjë prej krerëve të akuzuar në 21 vjet si dhe vetë UÇK në tërësi nuk kanë nevojë për asnjë mbrojtje publike, sepse përtej kësaj akuze të një gjykate eksperimentale ndërkombëtare, ata janë vendosur në anën e drejtë të historisë dhe e kanë bërë historinë vetë.
Duke i dhënë asaj pandryshueshmërinë në jetë të jetëve si histori e përjetshme e asaj pjesë të pandarë tonës që quhet Kosovë. Është falë tyre që u trondit ndërgjegja tërësisht e fjetur e perëndimit demokratik, e botës së qytetëruar në raport me Kosovën.
Është pikërisht falë tyre dhe falë një ndërmarrjeje çmendurie të atij grupi djemsh dhe vajzash që i hynë detit në këmbë duke patur gjithë botën kundër. Duke mos patur jo derë, por asnjë vesh të hapur asgjëkundi në kërkimin e asaj që duket se ka qenë aty gjithmonë: Kosova e pavarur, shtet sovran. Është falë tyre që u imponua reagimi me bomba i aleancës më të madhe të planetit”, tha Rama.
