Ish-kryetarja e Bashkisë Durrës, Valbona Sako dha dorëheqjen ditën e djeshme për shkak të 2 gafave që ajo bëri në televizion.
“Po i marrim njerëzit dhe po i dërgojmë në hotele me pesë yje, në të cilat ata nuk do të paguanin dot kurrë si pushues”, u shpreh Sako në “Abc News”, deklaratë e cila bëri xhiron në rrjetet sociale.
Mirëpo si duket ajo nuk është e vetmja që ka bërë një prononcim të këtij lloji. Kryeministri Edi Rama gjithashtu i ka thënë të njëjtën gjë banorëve me shtëpi të shkatërruara, që janë strehuar në hotele.
“Këtu është vëmendja e qeverisë se po të mos kishte vëmendje, do ishit akoima në shi dhe në çadër. Nuk është se nuk kanë ndodhur këto gjëra më përpara, por nuk ka bërë vaki ndonjëherë që njerëz të prekur nga fatkeqësitë të vijnë në hotele me pesë yje”, u shpreh ai.
Ndërkohë gafa tjetër e Sakos kishte të bënte me numrin e viktimave të shkaktuara nga tërmeti.
“Për hir të së vërtetës duhet ta themi që ky ishte një tërmet i nivelit shkatërrimtar, por që jemi të kënaqur me 50 viktima, sepse në rastet e tjera kanë qenë mbi 1000 viktima”, tha ajo në një prononcim për Top Channel.
