Joe Biden ka premtuar se nëse zgjidhet president do ta zhbëjë vendimin e Trump për t’u tërhequr nga Organizata Botërore e Shëndetit (OBSH).
Kandidati i demokratëve për zgjedhjet presidenciale në SHBA tha se ky do të jetë vendimi i parë që ai do të marrë.
“Amerikanët janë më të sigurt kur Amerika është e angazhuar në forcimin e shëndetit global. Në ditën time të parë si President, unë do të ribashkohem në Organizatën Botërore të Shëndetësisë dhe do të rivendos udhëheqjen tonë në skenën botërore”, tha ai.
Presidenti Trump e kishte sinjalizuar tërheqjen nga OBSH që në muajin maj, ndërsa të martën ai filloi zyrtarisht tërheqjen. Sipas tij, OBSH ishte nën kontrollin e Kinës gjatë krizës së koronavirusit.
Nga ana tjetër, Kina ka shprehur keqardhje për veprimin e Trump, duke thënë se ky vendim do të godasë vendet më të varfra.
“Ky vendim i Shteteve të Bashkuara minon përpjekjet ndërkombëtare dhe do të ketë pasoja të mëdha – veçanërisht për vendet në zhvillim që urgjentisht kanë nevojë për mbështetje ndërkombëtare. Ne i bëjmë thirrje Shteteve të Bashkuara për të përmbushur përgjegjësitë dhe detyrimet e saj ndërkombëtare dhe të tregojnë përgjegjësinë e një vendi të madh”, tha zëdhënësi i Ministrisë së Jashtme të Kinës, Zhao Lijian.
