Policia kap me dhjetëra kilogram hashash, por nuk ka drogë për të stërvitur qentë e saj. “Abc News” ka arritur të sigurojë dokumentin ku Ministria e Brendshme ankohet ndaj prokurorëve, se nuk u ka vënë në dispozicion drogë për qentë. Kërkesa i është dërguar kryeprokurorit, Olsian Çela, ndërsa ky i fundit ia ka përcjellë kërkesën Prokurorisë së Tiranës.
“Abc News” ka siguruar shkresën e firmosur nga Çela, ku thuhet se “Ministria e Brendshme ka ngritur shqetësimin në lidhje me mungesën e lëndës narkotike për nevoja të trajnimit të qenve të shërbimit policor. Drejtuesit e prokurorisë të mbajnë komunikime me strukturat e policisë, për ti informuar mbi çështje të dërguara në gjykatë, ku janë sekuestruar lëndë narkotike”.
Lënda: Kërkesa për bashkëpunim
Prokurorisë pranë Gjykatës së Shkallës së Parë
Me shkresën nr. 10279, datë 19.02.2019 “Mbi vënien në dispozicin të sasive të nevojshme të lëndëve narkotike për trajnimin e qenve të Institutit të Përgatitjes së Qenve të Policisë”, Ministria e Brendshme ka ngritur shqetësimin në lidhje me mungesën e lëndës narkotike, për nevoja të trajnimit të qenve të shërbimit policor.
Përsa më sipër, drejtuesit e prokurorisë të mbajnë komunikime me strukturat e policisë, për ti informuar mbi çështje të dërguara në gjykatë, ku janë sekuestruar lëndë narkotike sipas specifikimeve që u nevojiten. Bashkëngjitur edhe shkresa e Ministrisë së Brendshme.
