Presidenti Ilir Meta po mban një ceremoni gjatë së cilës ka vlerësuar Forcën e Sigurisë së Kosovës, për kontributin e tyre në situatën e krijuar nga tërmeti.
Kreu i shtetit shprehu falenderimet e tij për punën e tyre teksa shprehet se ata u paraqitën në vijën e parë të betejës “mes jetës dhe vdekjes”. Sipas tij, trupat ushtarake të Kosovës meritojnë emrin “shpëtimtarë”.
“Nuk ka emër më të mirë dhe vlerësim më të mirë se shpëtimtarë për të gjithë ju, do të donim ta kishim festuar 28 nëntorin me gjithë madhështinë që ka kjo ditë e bekuar, që ia kemi borxh Ismail Qemalit dhe Isa Boletinit, ta festonim së bashku në Vlorë, Tiranë, Prishtinë e Prizren, por ja që nuk ishte e thënë.
Por edhe ky 28 nëntor që sapo lamë na gjeti të përbashkuar si asnjëherë tjetër në historinë tonë, të gjithë shqiptarët kudo ku ishim e jemi për tu përballur me pasojat katastrofike të tërmetit. Në këtë betejë të vërtetë tashmë me një bilanc të rëndë lufte, Shqipëria nuk mbeti e vetme, vendet mike dhe partnerë na u gjendën pranë, por Kosova ishte e para që u ndodh atje menjëherë në luftën për të shpëtuar jetën e çdo shqiptari, ekipet tuaja ishin atje në radhë të parë njerëzisht, vëllazërisht e shqiptarisht duke rrezikuar jetën.
Populli shqiptar përjetë mirënjohje forcave të sigurisë së Kosovës, ekipit mjekësor, policor, njësisë së komunikimit dhe çdo ekipi që ishte atje e tregoi gatishmëri të jashtëzakonshme”, tha Meta.
