Pas ndërprerjes së seancës plenare, deputetja Rudina Hajdari u shpreh mjaft e prerë për listat e hapura, dhe kërkoi mbështetjen e gjithë opozitës parlamentare për ta realizuar këtë. Lidhur me bojkotimin e Parlamentit, nëse kanë ndërmend të marrin një iniciativë të tillë, Hajdari e la të hapur mundësinë. Ajo tha se janë të gatshëm për të bërë çdo lloj sakrifice, për të çuar në fund këtë kauzë që mbështetet nga gjithë shqiptarët.
“Propozimin e kemi bërë për të garantuar atë që kemi thënë që nga fillimi. Duam listat e hapura 100%, dhe të mos mashtrojmë shqiptarët. Kështu që për ta bërë atë propozim konkret, kemi nënshkruar një dokument që do depozitohet në Parlament. Shpresojmë që të na bashkohet e gjithë opozita”.
A mendoni se duhet bojkotuar sërish Parlamenti, njëri nga deputetët e tha këtë gjë?
“Jemi të gatshëm të bëjmë çdo lloj sakrifice, për të çuar në fund këtë kauzë që mbështetet nga gjithë shqiptarët. Ftoj të gjithë që të nënshkruajnë dokumentin. Ky hap listat 100% në mënyrë reale. Është një draft që ka një integrim të të gjithë kërkesave”.
