Kreu i qeverisë Edi Rama dhe Ministrja e Bujqësisë, Frida Krifca, prezantuan nga Durrësi buxhetin 2022 për peshkatarët. Gjatë fjalimit, Rama i dha edhe disa këshilla zv. Ministrit të Bujqësisë Roland Kristo.
Duke iu drejtuar zv. ministrit të Bujqësisë, Roland Kristo, kryeministri Rama i kërkoi atij më shumë angazhim për sektorin e peshkimit. Ai tha se brenda vitit, duhet të fillojë ndërtimi i markatës së peshkut në Durrës. Mjaft i drejtëpëdrejtë, Rama e paralajmëroi z. Kristo se duhet ta dëshmojë se e meriton postin që ka.
“Duhet të tregosh që e meriton të qëndrosh aty si zëvendësministër, dhe të na tregosh se sa është rritur peshkimi dhe sa anije janë rikonstruktuar me këtë fond. Këtu duhet të bëhet markata model, me standardet më të lartë të Bashkimit Europian.
Të gjithë ju që jeni këtu, kush do të futet aksioner në këtë markatë, të futet dhe të jetë e juaja. Ne do të garantojmë financimin, ju do fusni një pjesë të vogël, ne një pjesë të rëndësishme dhe pastaj pjesën tjetër do ta marrim me garanci sovrane. Menaxhimin do të bëni ju. Duhet të krijoni ju një autoritet më vete. Vitin e ardhshëm duhet të vish këtu bashkë me mua, të hapim themelet e markatës”, tha Rama.
“Je një çun i zoti, punëtor, por ke rënë në gjumë. Të mbajmë Landin zgjuar, sinqerisht ke rënë në gjumë”, iu drejtuar ai zv. Ministrit të Bujqësisë.
