Ministrja e Shëndetësisë, Ogerta Manastirliu, duke bërë një bilanc të situatës në vend sa i takon pandemisë, tha se java e 46 shënoi numrin më të lartë të vdekjeve.
Duke folur përmes shifrave, ministrja tha se vetëm 15-20% të kapaciteteve spitalore janë të lira.
“Duam të sqarojmë të gjitha ato pikat kyçe, që të gjithë qytetarët duan të dinë se çfarë hapash do të ndërmarrim.
Aktualisht kemi të konfirmuar 29 mijë e 837 raste. Përsa u përket fataliteteve, kemi 646 humbje jete dhe vlerësohet se java e 46 është java që kemi patur dhe një numër të lartë fatalitetesh. Vetëm 15-20% të kapaciteteve spitalore janë të lira”.
“Incidenca në Shqipëri është më e ulët se incidenca mesatare e Rajonit dhe Evropës. Nga 429 raste në javë jemi në 548 raste në javën e 46-të të pandemisë. 52% e të infektuarve janë femra, 48% janë meshkuj. Aktualisht kemi 646 humbje jete, 22.7 fatalitete për 100 mijë banorë, jemi më pak se Rajoni. Mosha e të vdekurve kryesisht është 65-74 dhe mbi 75 vjeç. 15-20% e shtretërve janë të lirë në tre spitale, ndërsa COVID 4 është gati për çdo rast. 420 shtretër janë të zënë me pacientë”, tha Manastirliu.
