Kryeministri Edi Rama ka folur për goditjen e institucioneve me molotov nga protestuesit e opozitës së bashkuar, si dhe për dhunën e ushtruar nga policia ndaj sekretarit organizativ të PD-së, Sahit Dollapi.
I ftuar në emisionin “Opinion”, Rama tha se molotovi është armë luftarake e shpikur në luftën e Spanjës, ndërsa përdoreshin për të hedhur tanket në erë.
Sa i përket goditjes me shkop gome ndaj Dollapit, kryeministri deklaroi se ai është qëlluar vetëm tri herë, teksa e konsideron një moment të gabuar nga ana e efektivëve të policisë.
Pjesë nga debati:
Rama: Këtu jemi në sulm ndaj institucioneve. Dmth armë luftarake. Molotovi është armë luftarake e shpikur në luftën e Spanjës kundër tankeve. Ato janë armë që përdoren për të hedhur tanket në erë.
Ky moment është një moment që ka ardhur si rezultat i një proteste që në fund të saj ka prodhuar 4 të vrarë. Dhjetëra të plagosur me armë zjarri. Nëse ju më tregoni një molotov të vetëm që i është hedhur derës së Kryeministrisë.
Fevziu: Dera e Kryeministrisë është goditur me makinë.
Rama: Mos bëni krahasime. Jam shumë krenar që ka ardhur dita që sot bëhet legjendë Sahit Dollapi për tre goditje me shkop gome
Fevziu: Ishin 13 goditje.
Rama: Kemi arritur një standard ku kryeministri dhe Ministri i Brendshëm thonë që ato sekonda ishin të gabuara, kur në këtë vend vriteshin njerëz dhe autorët të nesërmen dekoroheshin. Kryeministri dhe ministri e pranojnë se ishte moment i gabuar për standardin që kemi ne.
