Ish-kryebashkiaku i Lushnjes, Fatos Tushe, i arrestuar për “shpërdorim detyre”, ka kërkuar ndryshimin e masës së sigurisë “arrest në burg”, me pretendimin se është i sëmurë. Tushe pretendon se është alergjik ndaj ushqimeve, dhe se sipas mjekut, nuk duhet të qëndrojë në ambiente të mbyllura.
Po ashtu, në kërkesën për ndryshimin e masës së sigurisë, Tushe thotë se vuan nga zemra, diabeti, gurët në tëmth dhe se ka kolesterolin e lartë. Ish-kryetari i Bashkisë së Lushnjes Fatos Tushe kërkon lirinë në Gjykatën e Apelit. “Kërkoj ndryshimin e masës së sigurisë, pasi nuk ka dyshime të arsyeshme dhe për shkak të gjendjes shëndetësore shumë të rënduar që kam”.
Njohjen me biznesmenin Ibrahim Lami nuk e ka mohuar. “E njoh, por nuk kam lidhje me tenderin”, tha ai përpara Gjykatës së Apelit.
Fatos Tushe u arrestua më 6 korrik me 10 vartësit e tij, nga një operacion i ndërmarrë nga SPAK, për akuzën e “shpërdorimit të detyrës”. Bëhej fjalë për një tender me vlerë rreth 23 mln lekë për rehabilitimin e një kanali ujitës në fshatrat Bishqethëm dhe Bitaj.
Ky tender është fituar nga një kompani EuroAlb shpk, që kishte sjellë ofertën më të lartë, por më pas punimet dhe fitimet dhe punën e ka bërë një kompani tjetër, e biznesmenit Ibrahim Lami.
Fatos Tushe u shkarkua nga detyra nga kryeministri Edi Rama, pas aferave korruptive në të cilat ai ishte përfshirë dhe aktualisht ndodhet në masën e sigurisë “arrest në burg”.
