Autori i dy vrasjeve në Patos, Martin Skëndaj ka pranuar për hetuesit se krimin e ka kryer ai.
Punonjësi i Policisë së Burgut i cili vrau Manol Rapaj dhe Elis Kapaj ka dhënë edhe arsyen se pse sipas tij u detyrua që të qëllojë në drejtim të tyre.
“Më dhunoi fqinji pse i kërkova të heq dorë nga kërkesa që kisha për time motër. U bë sherr në fshat, njoftova edhe Policinë para tri ditësh.
Ditën e krimit në mëngjes, nisi përsëri sherri, ai kishte marrë edhe kushëririn e tij aty, u bënë dy bashkë dhe më qëlluan. Erdha në spital të marr mjekim, ata i gjeta prapë aty.
U përleshëm, por ishin dy dhe nuk munda t’i neutralizoj, prandaj qëllova, pasi u kisha bërë thirrje disa herë të tërhiqeshin”, ka thënë ai.
Pas aktit kriminal autori ka marrë në telefon Policinë dhe u ka treguar për ngjarjen. Ai u tha atyre se ishte larguar nga vendi i krimit nga frika e ndonjë hakmarrjeje të mundshme.
Ai ka takuar forcat e policisë rreth 500 m larg Poliklinikës së Patosit. Bëhet me dije se autori i vrasjeve kishte kërkuar zgjidhje nga Policia e Fierit për shqetësimin që i krijonte Rapaj, por ata nuk kanë vepruar.
