Presidenti Gjorge Ivanov në Konferencën “Kina – Evropa Qendrore dhe Lindore”, theksoi se Bashkimi Evropian nuk po hedh asnjë cent për të investuar në Maqedoni. Në konferencën e zhvilluar në Ohër, Ivanov u shpreh se Brukseli nuk po e mbështet vendin e tij me asnjë projekt konkret, ndaj sipas tij, Maqedonia po i drejton sytë nga Kina.
“Që të përfshihemi në mënyrë të barabartë në Zonën Ekonomike Evropiane, është e domosdoshme që të jemi pjesë e barabartë e rrugëve, hekurudhave dhe korridoreve energjetike evropiane. Pasi që BE-ja ende nuk i mbështet projektet e mëdha të infrastrukturës, kemi vendosura me kredi të volitshme kineze nga nisma 16 plus 1, të ndërtojmë një pjesë të rëndësishme të Korridorit 8”, deklaroi presidenti Gjorge Ivanov.
Ndërkaq, Dejun Cao, profesor nga Kina vlerësoi se Maqedonia dhe vendet e rajonit kanë në dispozicion mjete të mëdha financiare nga Kina, që mund të përdoren, por për këtë duhet përkushtim më i madh nga autoritetet.
“Kina tashmë punon disa projekte infrastrukturore në Maqedoni dhe ata janë kryesisht në infrastrukturën rrugore. Nga kontrata e kompanive me njërën ose palën tjetër, varen të gjitha projektet tjera që do të zbatohen në të ardhmen”, tha Dejun Cao, profesor universitar nga Kina.
