Riatdhesohen vullnetarisht 120 shtetas shqiptarë nga Franca. Sipas njoftimit të policisë, me këtë veprim, ata kanë shmangur penalitetet e mundshme, që rrjedhin nga mosrespektimi i afateve të qëndrimit në zonën Schengen.
Shefi i Komisariatit të Policisë Rinas, Përparim Dema u shpreh se ky operacion merr rëndësi nga fakti që kthimi i tyre është bërë vullnetarisht, ndërsa konsiderohet si një element ndihmës në parandalimin e lëvizjes së parregullt në zonën Schengen.
“Dua t’u bëj një apel gjithë qytetarëve shqiptarë të mos abuzojnë me lirinë e lëvizjes së lirë. Shqipëria është një vend i sigurt dhe i tillë konsiderohet edhe nga vendet e BE-së dhe kërkesat për azil nuk kanë shanse për t’u aprovuar”, deklaroi Dema.
Në lidhje me pasojat e mundshme që mund të bien mbi personat që shkelin rregullat e lëvizjes së lirë në vendet e BE-së, Dema tha: “Deportimi nga vendet e BE-së shoqërohet edhe me masa të tjera shtesë, që janë edhe ndalimi deri në disa vite i udhëtimit në zonën Schengen”.
Tre ditë më parë në Rinas u riatdhesuan edhe 100 shtetas të tjerë, të cilët u kapën në Francë, Belgjikë e Gjermani.
