Pas Francës, edhe Italia pritet të ndalojë disa shërbime për njerëzit e pa vaksinuar. Duke marrë shkas nga numrat në rritje të infektimeve dhe për të parandaluar një valë tjetër të Covid-19, qeveria italiane pritet të vendosë kufizime të reja.
Të gjithë personat që nuk janë vaksinuar plotësisht, mund t’u ndalohet shërbimi brenda në restorante, bare, stadiume, muze, teatro, kinema, pishina dhe palestra. Kjo masë është për të stimuluar edhe më shumë qytetarët për tu vaksinuar.
Dekreti pritet të miratohet këtë javë, dhe mund të hyjë në fuqi nga data 26 korrik. Infeksionet, kryesisht si pasojë e variantit Delta, janë rritur gjatë javës së kaluar. Varianti Delta, që fillimisht është identifikuar në Indi në tetorin e vitit 2020, nga Organizata Botërore e Shëndetësisë është futur në grupin e varianteve shqetësuese të COVID-19. Aty bëjnë pjesë edhe varianti Alfa (i identifikuar fillimisht në Britani të Madhe), Beta (i identifikuar fillimisht në Afrikë të Jugut) dhe Gama (i identifikuar fillimisht në Brazil).
