Flamujt në gjysmështizë dhe një minutë heshtje. Ishte kjo panorama e përgjitshme e asaj që po ndodh në Italinë fqinje, e cila ka qarë për familjarët që u shuan nga koronavirusi vdekjeprurës. Sot në orën 12:00, të gjitha bashkitë e Italisë, në shenjë zie kanë ulur në gjysmështizë flamurin tri ngjyrësh, dhe kanë mbajtur një minutë heshtje. Një mënyrë kjo për të kujtuar viktimat e koronavirusit, si dhe për të nderuar sakrificën dhe angazhimin e profesionistëve të kujdesit shëndetësor.
Flamuri italian në gjysmështizë është shfaqur në të gjitha ndërtesat publike. Presidenca ishte një nga institucionet e para që iu bashkua zisë. Në ballkonin e sheshit, flamujt u ulën në gjysmështizë nga flamurtarët. Ambasadat italiane jashtë vendit iu bashkuan gjithashtu iniciativës.
Deri tani, Italia shënon 11. 591 të vdekur dhe 101.739 persona të prekur me koronavirus. Italia po lufton me të gjitha forcat, për të frenuar përhapjen e infeksionit, dhe zgjerimin e epidemisë në rajonet jugore të vendit.
