Presidenti Ilir Meta ka folur në lidhje me situatën e vështirë që është krijuar në Evropë, që nga shpërthimi i koronavirusit.
Në një intervistë për agjencinë italiane të lajmeve ADN Kronos me seli në Bruksel, Meta tha se në të kaluarën Evropa ka kaluar periudha shumë më të vështira sesa kjo aktuale, përfshirë dy Luftëra Botërore.
“Unë e kuptoj keqardhjen dhe ndryshimet që po ndodhin në këtë periudhë të vështirësive të mëdha. Por, më lejoni t’ju them se Evropa ka kaluar periudha shumë më të vështira, përfshirë dy Luftëra Botërore në shekullin e kaluar. Është e domosdoshme që në projektin evropian të kishte hapësirë, si për të mirat që sjell integrimi dhe tregu i përbashkët, por gjithashtu do të ishte e nevojshme të ruhen traditat dhe kultura, të gjitha në emër të lirisë dhe demokracisë”, tha ai.
Meta ka folur edhe për gjendjen e rëndë në të cilën ndodhet Italia, si dhe ka komentuar dërgimin e 30 mjekëve dhe infermierëve shqiptarë për t’iu ardhur në ndihmë.
“Fatkeqësisht Italia po paguan një çmim shumë të lartë. Prandaj, për Shqipërinë të qenit në ndihmë të popullit italian sot nuk është vetëm një gjest ndihme dhe solidariteti, por edhe një mundësi për të shkëmbyer përvojë për mjekët tanë të rinj dhe stafin shëndetësore, për të ndihmuar zonat më të prekura.
Historia e ndihmës reciproke ndërmjet popujve tanë daton shekuj më parë, kur shqiptarët u bënë diga që ndaloi pushtimin otoman, së pari të Italisë dhe më pas të Evropës, periudhë që zgjati për shumë vite e shumë shekuj. Këtë lidhje të fortë e dëshmojnë gjithashtu Komuniteti i vjetër arbëresh në Itali që jetojnë në Siçili, Kalabri, Basilicata, Puglia, Campania, Molise, Lazio dhe Abruzzo, por gjithashtu edhe komuniteti i ri i shqiptarëve që mbërriti në Itali pas vitit 1990, një pjesë sot qytetarë italianë, dhe rezidente pikërisht në zonat më të prekura nga pandemia.
Si mund ta harrojmë Italinë dhe ndihmën e saj në të gjitha krizat shqiptare nga viti 1991 deri në 1997, gjatë luftës së Kosovës së vitit 1999 dhe tërmeti i fundit i 2019. Ne jemi dy vende fqinje dhe dy popuj fqinj. Unë e them shpesh, gjithçka mund të ndryshojë, por gjeografia nuk mundet”, tha Meta.
