Kryeministri italian, Giuseppe Conte prezantoi sot dekretin e ri “Fillon Faza 2 dhe tani duhet të jetojmë me virusin”.
Dekreti i cili pritet të firmoset sonte, do të hyjë në fuqi duke filluar nga data 4 maj. Conte shtoi se së bashku me të gjithë ekipin e ministrave janë të angazhuar për rimëkëmbjen, për të ndryshuar gjithçka që është e gabuar.
“Sjellja e përgjegjshme e secilit prej nesh do të jetë themelore: nuk duhet të afrohemi kurrë, distanca e sigurisë duhet të jetë së paku një metër. Çështja është të mbajmë distancën shoqërore ose të rrisim kurbën. Nëse e doni Italinë, mbajeni distancën”, tha ai.
Rajoni e provinca do të komunikojnë çdo ditë situatën e kurbës së infektimit. Në çdo 3 ditë një ekip ekspertësh i Ministrisë së Shëndetësisë do të analizojë ecurinë e territorit e do të marrë masa për hapje ose mbyllje.
Sa i përket çmimit të maskave, Conte tha se çmimet e tyre do të fiksohen dhe kontrollohen.
“Në një dekret të ardhshëm ne duam të eliminojmë TVSH dhe maskat duhet të kushtojnë 0.5 euro”, sqaroi ai.
Ndërkohë mësohet se nga 4 maji do të lejohen funeralet, por me një maksimum prej 15 personash me maska dhe distanca.
Çfarë përcakton dekreti që hyn në fuqi prej 4 majit?
– Nuk lejohet lëvizja nga një rajon në tjetrin, lejohet lëvizja vetëm brenda rajonit për motive pune, shëndeti e për të takuar të afërmit.
– ndalohen grumbullimet, eventet e festat private e publike
-hapen parqe e vila publike e historike
– lejohet aktiviteti sportiv në natyrë në distancë 2 metra nga njëri-tjetri
– lejohet stërvitja e sportistëve në respekt të masave të distancimit social në sporte jo kolektive
– lejohet ceremonia e varrimit me maksimumi 15 persona
– lejohet aktiviteti i bareve e restoranteve për të marrë ushqim ose për të transportuar, por jo për konsum.
– më 4 maj hapen aktivitete në sektorin e manifakturës, në sektorin e ndërtimit e në ato të shitjes me shumicë.
– protokoll sigurie për mjetet e transportit publik
– protokoll sigurie për punëtorët e sektorit të ndërtimit
-më 18 maj lejohet hapja e çdo aktiviteti tregtar, dyqane, muzeve, ekspozita , biblioteka
– lejohen të hapen më 1 qershor parukeri, qendra estetike, bare e restorante.
