Për të tretën ditë radhazi, Italia po regjistron një rënie të numrit të viktimave të shkaktuara nga koronavirusi.
Në 24 orët e fundit, në vendin fqinj kanë humbur jetën 130 njerëz, 26 më pak se një ditë më parë. Kështu numri total i viktimave nga COVID-19 shkon në 32,616.
Sa i përket rasteve të reja të konfirmuara, ditën e sotme janë regjistruar 652 raste, 10 më shumë se dje. Me më shumë se 228 mijë raste të konfirmuara, Italia renditet e gjashta në botë për numrin më të lartë të rasteve, pas SHBA-ve, Rusisë, Brazilit, Spanjës dhe Mbretërisë së Bashkuar.
Mbi 136 mijë persona janë shëruar nga koronavirusi në vendin fqinj, ndërsa 59,322 raste janë ende aktive. Prej tyre, 8,947 po kurohen në struktura spitalore dhe 595 në repartet e terapisë intensive.
COVID-19 ka prekur më shumë se 5,2 milionë njerëz nga e gjithë bota, ndërsa i ka marrë jetën mbi 336 mijë personave.
