Një lajm i keq vjen nga Italia, teksa raportohet se ka shkuar në 100 numri i viktimave nga koronavirusi në mesin e mjekëve.
Presidenti i shoqatës së mjekëve FNOMCEO-s, Filippo Anelli deklaroi se bëhet fjalë për një mjeke 62-vjeçare nga Venecia.
“Viktima e fundit ishte një 62-vjeçare, e cila ishte mjeke familjeje në Mira, një qytet në provincën e Venecias. Çdo viktimë ka lënë një mbresë të thellë në zemrën e secilit mjek italian. Mangësitë dhe dobësitë organizative janë të vështira për t’u kuptuar dhe madje edhe më të vështira për t’u arsyetuar në dritën e këtyre numrave tragjikë”, tha ai.
Deri më tani në Itali janë regjistruar rreth 140 mijë raste infektimi, ku 10% e tyre janë personel mjekësor.
Italia mban vendin e parë për numrin më të madh të viktimave nga COVID-19, (17,669), teksa nuk është publikuar ende bilanci ditor për sot.
Sa i përket numrit më të madh të të infektuarve, Italia mban vendin e tretë, pas SHBA-ve (435,941) dhe Spanjës (152,446).
