Një ngjarje e rëndë ka ndodhur në Itali. Një shqiptar, 32 vjeç është qëlluar me armë në një nga baret e Napolit. Mediat italiane kanë zbuluar detaje nga ngjarja.
Sipas mediave të vendit fqinj, shqiptari është qëlluar me armë dhe ka marrë dy plumba në trup. Ai ka qenë duke konsumuar një kafe në një nga baret e zonës, teksa autori ka hyrë brenda, ka nxjerrë armën dhe e ka qëlluar. Në momentin e ngjarjes lokali ka qenë i mbushur plot me klientë.
Fatmirësisht, asnjëri prej plumbave nuk i ka prekur organet vitale dhe ai vetëm është plagosur. Menjëherë është dërguar në spital dhe nën kujdesin e mjekëve ka arritur të dalë jashtë rrezikut për jetën.
Hetimet e para tregojnë që ngjarja mund të jetë kryer nga një tjetër shqiptar. I plagosuri ishte me pasaportë angleze dhe ende s’janë bërë të ditura gjeneralitetet e tij nga policia.
