Nga sot hyn në fuqi certifikata e vaksinimit në Itali. Pavarësisht protestave dhe rebelimit në masë nga ana e qytetarëve, qeveria italiane ka vendosur që nga 6 gushti, ky dokument do të kërkohet për ata që duan të shkojnë në restorante dhe për një varg shërbimesh e aktivitetesh. Kjo masë ka hyrë në fuqi, me qëllim të përshpejtimit të vaksinimit të popullsisë, për ta luftuar variantin Delta.
Ditën e enjte, Qeveria italiane vendosi që edhe mësuesit duhet të kenë dëshmi të imunitetit nga Covid-19 para se të hyjnë në klasë, megjithatë një dëshmi e tillë nuk kërkohet për nxënësit minorenë.
Kabineti i Mario Draghi-t e zgjeroi kërkesën për pasaportë të gjelbër, për të gjithë mësimdhënësit, studentët dhe për transportin në largësi të madhe nga 1 shtatori.
Me masën e re, mësuesit nuk do të mund të punojnë pa këtë certifikatë, dhe pas pesë ditësh mungesë, nuk do të paguhen më. Pasaporta e Gjelbër nuk është gjë tjetër veçse një certifikatë digjitale ose e shtypur në letër, e cila tregon se qytetari e ka marrë të paktën dozën e parë të vaksinës, ka dalë negativ në test ose është shëruar së fundi nga Covid-19.
