Situata nga koronavirusi në Itali vijon të jetë e qëndrueshme, duke mos pasur lëkundje të mëdha në shifra.
Gjatë 24 orëve të fundit, në vendin fqinj janë shënuar 21 viktima nga koronavirusi, dy më pak se një ditë më parë. Kështu shkon në 34,788 numri total i personave që kanë humbur jetën nga COVID-19 në Itali.
Sa i përket rasteve të reja, në 24 orët e fundit ka pasur një rritje të lehtë të shifrave. Ditën e sotme janë shënuar 182 raste të reja, 40 më shumë se dje.
Deri më tani, Italia ka regjistruar më shumë se 240 mijë raste me koronavirus, duke u renditur e nënta në botë me numrin më të lartë të rasteve.
Në vendin fqinj ndodhen më shumë se 15 mijë raste aktive.
