Instituti Kombëtar i Shëndetit i Italisë, deklaroi ditën e sotme se rreth 99% e viktimave të shkaktuara nga koronavirusi që nga muaji shkurt i këtij viti, nuk kanë qenë plotësisht të vaksinuar.
Sipas raportit, njerëzit e vaksinuar plotësisht që kanë vdekur, kanë qenë shumë më të vjetër se ata që kanë vdekur pa vaksinim të plotë: 88.6 vjeç kundrejt 80. Ata gjithashtu kanë pasur më shumë probleme shëndetësore përpara se të prekeshin nga koronavirusi, shkruan AdnKronos.
Ky rezultat mund të shpjegohet me faktin se njerëzve të moshuar dhe më të rrezikuar u është dhënë përparësi për vaksinim dhe për këtë arsye kjo përfaqëson popullatën me prevalencën më të lartë të vaksinimit me cikël të plotë në datën e kryerjes së këtij vlerësimi.
Italia konfirmoi 24 viktima nga koronavirusi në 24 orët e fundit, krahasuar me 22 një ditë më parë, ndërsa numri ditor i të infektuarve u rrit në 4,522 nga 3,117.
Javën e kaluar, Italia ka njoftuar se dëshmia e vaksinimit ose imunitetit nga koronavirusi do të jetë së shpejti e detyrueshme për një sërë aktivitetesh në këtë vend, përfshirë ngrënien në ambiente të mbyllura dhe hyrjen në palestra, pishina, muze dhe kinema.
