Një 35-vjeçar është qëlluar me armë zjarri mbrëmjen e djeshme, teksa ishte ulur në një lokal në lagjen “Gurra”.
Ka mbetur i plagosur Ridvan Koca, banues në Lezhë, ndërsa është dërguar menjëherë në spitalin rajonal nga banorët e zonës, ku ndodhet jashtë rrezikut për jetën.
Koca ka deklaruar para grupit hetimor se nuk ka konflikte dhe se nuk e njihte atentatorin.
“Nuk kam konflikte me njeri dhe nuk kam dijeni se kush mund të jetë atentatori”, dëshmoi ai.
Sipas informacioneve Koca po qëndronte në lokal, kur pak minuta pasi ishte ulur një person i është afruar dhe e ka qëlluar në drejtim të këmbëve të tij.
Ndërkohë, uniformat blu kanë shoqëruar disa persona që ishin të pranishëm në momentin kur ndodhi plagosja. Grupi hetimor po punon për zbardhjen e shkaqeve, ndërsa ende nuk ka informacion mbi autorin dhe motivet.
