Në Kinë, ish-shefi i Interpolit Meng Hongwei u dënua me 13 vjet e gjysmë burgim pasi pohoi se kishte marrë ryshfete që kapnin më shumë se 2 milion dollarë.
Dënimi i tij të martën në një gjykatë të Tiencinit i jep fund një sage të gjatë ligjore që filloi në vitin 2018, kur ai u zhduk gjatë një vizite që po bënte në Kinë, ku kishte shkuar nga Franca, selia e Interpolit. Përveç dënimit me burg, ai u gjobit edhe me 290,000 dollarë.
66-vjeçari Meng u zgjodh për një mandat katër vjeçar si president i organizatës policore globale në vitin 2016, kur ishte ende zëvendësministër i Sigurisë Publike dhe shef i policisë detare, shkruan “Voa”.
Atij i janë hequr të gjithë titujt dhe është përjashtuar nga Partia Komuniste, duke u bërë njëri nga shumë zyrtarët e partisë të arrestuar si pjesë e goditjes së gjerë të Presidentit Xi Jingping ndaj korrupsionit zyrtar.
