Sepp Blatter, ish-presidenti i FIFA-s, po kalon një periudhë të keqe shëndetësore dhe është i shtruar në një spital në Zvicër, por fatmirësisht rrezikun për jetën e ka kaluar.
84-vjeçari e ka kaluar edhe koronavirusin para pak kohësh. Lajmin për gjendjen e tij shëndetësore e ka dhënë vajza e tij, Corinne Blatter Andenmatten.
“Babai im është në spital. Ai po bëhet më mirë çdo ditë. Por ai ka nevojë për kohë dhe pushim. Në emër të familjes time unë kërkoj privatësi”, ka thënë vajza ish-presidentit sipas gazetës zvicerane Blick.
Blatter e drejtoi futbollin për 17 vite, por largimi i tij bëri bujë pasi u pretendua se kishte bërë një pagesë prej 1.6 milionë paund ndaj presidentit të kohës të UEFA-s, Mishel Platini, i cili do të shërbente si konsulent dhe ky rast u konsiderua si skandal në botën e futbollit.
Hetimet dhe vendimi pasues i mbështetur nga Gjykata e Arbitrazhit për Sportin, e ndaloi atë nga çdo veprimtari futbolli për gjashtë vjet, pasi zbulimit të korrupsionit në FIFA, edhe pse Blatter dhe Platini e kanë mohuar vazhdimisht të kenë kryer korrupsion.
