Dy deputete të Partisë Socialiste janë prononcuar lidhur me grabitjen e ndodhur dje në Rinas.
Ish-ministrja e Mbrojtjes, Mimi Kodheli refuzon ta quajë ngjarjen në aeroport “cenim të sigurisë kombëtare”, ndërsa pranon se ajo është mjaft e rënde dhe se duhet parë me seriozitet.
“Cenimi i sigurisë kombëtare është fjalë e madhe, por ngjarja e Rinasit është e rëndë dhe duhet parë me seriozitet”, u shpreh deputetja.
Edhe Ermonela Felaj tha në Komisionin e Sigurisë se ngjarja ishte shumë e rëndë, si dhe vuri në dukje nevojën për rishikim të koncesioneve.
“Ngjarja ishte shume e rëndë. Ajo tregoi nevojën për rishikim të koncesioneve jo vetëm në aeroportin e Rinasit por edhe në vende të tjera. Edhe pse është e vështire, duhen marrë masa për rishikim të koncesioneve. Përgëzoj punën dhe ndërhyrjen e Policisë së Shtetit”, tha Felaj.
