Prokurorët e SPAK do të marrin në pyetje sot për çështjen e inceneratorëve ish-ministrin e arrestuar të Mjedisit, Lefter Koka. Ai gjendet nën dy masa arresti për shkak të dy inceneratorëve, ndërkohë që ende nuk është pyetur në lidhje me akuzat e reja që i janë shtuar atij me hapin e radhës që bëri Prokuroria e Posaçme për hetimin e skandalit të inceneratorëve në vendin tonë. Dëshmia do të kërkohet për të mësuar lidhjen e Kokës jo vetëm me praktikat e tenderimit, por edhe me falsifikimin e shkresave.
Ish-ministri i Mjedisit, Lefter Koka do të transferohet nga burgu “313” në Tiranë, në paraburgimin e Durrësit. Pasi gjykata dha “arrest me burg” për Kokën, ai u transferua fillimisht në ambientet e “313”-ës ku qëndroi disa kohë, por për arsye shëndetësore u vendos transferimi i tij në spitalin e burgut. Mesa duket, me mbërritjen e ish-deputetit Alqi Bllako në ambientet e burgut “313”, është menduar që të dy të ndahen për arsye sigurie dhe hetimore dhe Koka të transferohet në paraburgimin e Durrësit.
Kjo është hera e parë që ish-ministri i Mjedisit, Lefter Koka, do të merret në pyetje që pas arrestimit të tij. Ish-ministri i Mjedisit Lefter Koka akuzohet për “korrupsion” dhe “shpërdorim detyre”.
Një ditë më parë u mor në pyetje për rreth tre orë edhe ish-deputeti i Partisë Socialiste Alqi Ballko. Bllako ka mohuar akuzat dhe pretendimet e SPAK, si i përfshirë në këtë aferë korruptive, duke pretenduar se nuk ka pasur funksion vendimarrje. Sipas tij, procedura është kryer dhe është ndjekur nga komisioni i ngritur për këtë çështje në Ministrinë e Mjedisit, ndërsa ai vetëm i ka përcjellë shkresën Këshillit të Ministrave për miratim.
