SHBA e tha qartë pak ditë më parë se ish-kryeministri Berisha, nuk duhet të jetë pjesë e deputetëve të PD-së në parlamentin e ri që fillon punimet në shtator. Ish-ministri i Drejtësisë me LSI-në, Ylli Manjani, ka bërë një tjetër reagim duke marrë shkas nga deklaratat e fundit të Yuri Kim, për të mos lejuar futjen e Sali Berishës në parlamentin e ri.
Manjani i është vënë në mbrojtje Berishës, duke e cilësuar si të pakuptimtë largimin e tij, për shkak të konceptit “xhaketë e vjetër”. Diplomatja amerikane, Yuri Kim, i kërkoi kryedemokratit Basha që të distancohet nga Sali Berisha.
Ajo u shpreh se “Një parti nuk mund të ‘hajë bar’ për hir të një deputeti”, referuar shprehjes së thënë në komunizëm “edhe bar do hamë, dhe nuk do i përkulemi armikut”.
Statusi
Sa për kujtesë, atyre që artikulojnë teorinë e xhaketave të vjetra në politikë. Përtej diferencave të moshës biologjike Sali Berisha, Edi Rama, Ilir Meta e shumë të tjerë, kanë të njëjtën kohë qendrimi në politikë.
Në 1990 e kanë filluar aktivitetin politik dhe ende vijojnë, pavarësisht roleve që kanë apo intensitetit me të cilin bëjnë politikë. Madje, Edi Rama e Sali Berisha kanë një histori përplasje brenda PD në ditët e para të themelimit të saj… Gjithashtu Ilir Meta, Sali Berisha e Edi Rama kanë 30 vite që përplasen e pajtohen me njëri-tjetrin…
Këto janë fakte, jo llafe. Prandaj ose këto janë gjithë në bllok xhaketa të vjetra dhe duhet të hapin krahun, ose s’ka kuptim që dikush u dashka të largohet e dikush tjetër jo, për shkak të konceptit “xhaketë e vjetër”. Nga politika të largon vota dhe vullneti personal, jo xhaketa. As mosha dhe as zonja Kim…
