Ish-ministri i Jashtëm, Paskal Milo teksa ka komentuar marrëdhiniet diplomatike midis Shqipërisë dhe Turqisë, solli në vëmendje krisjen mes ish-kryeministrit Sali Berisha dhe homologut të tij turk asokohe, Rexhep Tajip Erdogan, i cili tashmë mban postin e Presidentit.
I ftuar në emisionin ”Real Story”, Milo deklaroi se kur Erdogan ka ardhur për të mbajtur fjalën në Kuvend në vitin 2009, Berisha nuk ka marrë pjesë në seancë.
Sipas tij, kishte një pakënaqësi të ndërsjelltë mes të dy liderëve dhe Berisha protestoi me mungesë në seancë.
Paskal Milo: ”Të gjitha qeveritë shqiptare pas vitit 1990 kanë pasur marrëdhënie miqësire korrekte, me pak ulje –ngritje nga individë të caktuar politikë, por Turqia nga objektivat që ka në Ballkan e Shqipëri e mirëkupton pozitën ndërkombëtare delikate të Shqipërisë. Marrëdhëniet Erdogan-Berisha të asaj kohe ishin të shkëlqyera, por kur Erdogan ka ardhur për të mbajtur fjalën në Kuvendin e Shqipërisë në 2009, Berisha nuk ka marrë pjesë në seancë. Dhe kjo është mbajtur shënim atëhere. Kur ka ardhur Erdogan, ka përshëndetur Kuvendin e Shqipërisë, dhe e di që atëhere u komentua mungesa e Berishës. Me duket se pati pakënaqësi të ndërsjelltë, dhe Berisha protestoi duke mos ardhur në seancë.”
