Gjykata e Posaçme ka rrëzuar kërkesën e ish-kryeprokurorit Adriatik Llalla për pezullim, dhe shtyrje të ekzekutimit të dënimit. Llalla i kërkoi gjykatës të pezullojë ekzekutimin e vendimit të Gjykatës së Posaçme të Apelit me dy vite burg.
Me anë të avokatit të tij, Llalla i cili ndodhet në arrati, i dorëzoi një kërkesë GJKKO, duke kërkuar pezullimin e dënimit, me pretendimin se çuarja e tij në qeli mund të sillte pasoja të rënda për shëndetin e tij, për shkak të një sëmundje që ai vuan prej kohësh. Por kjo kërkesë e Llallës u rrëzua sot nga GJKKO.
GJKKO vendosi dënimin me 2 vite burg për ish-Prokurorin e Përgjithshëm, Adriatik Llalla, nën akuzat e “fshehjes së pasurisë”, “shpërdorimit të detyrës” dhe “pastrimit të parave”. Ish-Kryeprokurori është dënuar gjithashtu me 5 vite përjashtim nga postet publike, si dhe ia janë konfiskuar disa pasuri.
Prej datës 8 tetor, Llalla u shpall nga SPAK zyrtarisht në kërkim ndërkombëtar, pasi policia e Tiranës nuk e gjeti atë brenda vendit. Më 22 shtator, ditën kur u dha dënimi, policia shkoi në banesën e Llallës për ta prangosur, por ai nuk ndodhej aty. Familjarët thanë se “nuk e dinin se ku ndodhej”.
Ai ishte larguar nga Shqipëria më 7 shtator nga Rinasi drejt Romës. Ndërkohë që vendndodhja e tij nuk dihet se ku është aktualisht.
