Pas largimit të Sali Berishës nga kreu i PD-së në 2013, një prej kandidaturave ishte edhe Astrit Sinanaj. 68-vjeçari me origjinë nga Fieri, provoi përsëri në zgjedhjet e 2017 brenda Partisë Demokratike. Por, në të dyja herët ai u mund prej Lulzim Bashës. Është demokrat i vjetër, por përsëri ka kritika të forta.
“PD-ja është si gjithë partitë e tjera që mbështet diktaturën dhe liderin. Para shumë vitesh unë i shkruaja shpesh Berishës në telefon ku i shprehja kritikat e mija. Ishte ne kohën kur ai tha se nëse ndeshemi me korrupsion, të telefononim atë. Shih çfarë monopolisti, sikur Berisha ishte Perëndia e vendit dhe ai do zgjidhte gjithçka. Në një kohë kur korrupsioni është produkt i veprimtarisë së tij.
Berisha nuk ka pasur asnjë ideal, nuk ka cilësuar apo shënjuar diçka. U shfaq një tjetër diktaturë, pasi uzurpoi shumë pushtete. Askush nga këta partiak nuk ka një shenjë demokracie, por çdo gjë e merr përsipër ai, të vendosë dhe zbatojë ai. Ndërkohë të tjerët rrinë vetëm si kukull, ky është demokrati i kohës së sotme, sipas tyre.
Është e kotë të flas për Lulzim Bashën, ai është një shëmbëlltyrë e asaj që ka pasur dhe dashur Saliu. Lulzimi nuk e ka idenë e demokracisë, nuk njeh asnjë rregull demokracie,”-shprehet ai për Tirana Today.
Për Sinanaj e gjitha është një show prej partive, që nga përgjimet e deri te protestat. Kjo pasi nuk i sjellin asnjë përfitim popullit.
“Jam kundër sepse çfarë kërkohet, hajde heqim tjetrën që të shkoj unë?! Supozojmë se e kapën, ashtu është e vërteta, e hoqën Fatmir Xhafajn, ia arrestuan të vëllain, por çështja është se çfarë u zgjidh për popullin.” TIRANA TODAY
