Ish-deputetja e PD-së, Albana Vokshi, ka bërë me dije se në protestën e 11 majit ajo është dhunuar nga policë me grushta e shkelma. Ajo e ka cilësuar dhunën e policisë si të paprecedentë.
Vokshi ka sqaruar më tej se policia reagoi aq ashpër, kjo me urdhër të kryeministrit Rama e ministrit Lleshaj, duke mos kursyer dhunën ndaj saj. E ftuar në Syri.net, për të komentuar dhunën policore në protestën e 11 majit, ish-deputetja e PD-së shtoi se në 20 vite politikë, si kjo situatë nuk ishte hasur më parë.
“Dhunë e paprecedentë! Kam 20 vjet në politikë, por kurrë dhunë si kjo nuk më kanë zënë sytë. Me urdhër të Lleshit dhe Ramës kanë ushtruar dhunë ndaj meje, një femër, që isha vetëm dhe pa turmë protestuesish nga pas.
Iu jam drejtuar fillimisht grupit të forcave speciale që kishin pushtuar rrugën para Parlamentit, që rrihnin këdo që i dilte përpara. Kur ndodhi dhuna ndaj Dollapit, kam qenë duke iu ardhur në ndihmë dy gazetarëve që ndjeheshin keq nga gazi që hidhej pa kriter.
Ka pyetur ku e keni çuar Sait Dollapin? Më thanë që e kanë marrë forcat policore të Ministrisë së Brendshme. Urdhëruan që të largohem me dhunë. Jam goditur nga disa policë me grushta dhe shkelma. Isha grua e vetme, me vetëm një celular në duar”, u shpreh Vokshi.
