Ish-deputetja e LSI-së, Kejdi Mehmetaj komenton ashpër daljet e kryeministrit duke i cilësuar ‘shakatë’ e tij si aspak qesharake.
Me anë të një postimi në Facebook, Mehmetaj deklaron se të gjithë njerëzit rreth kryeministrit Rama, e mbështesin vetëm nga frika.
“Me tepsi e kazan, legena e fallxhorë nuk bën për të qeshur as lali Erin, dhe as kandidatet kukulla që ke vendosur nëpër bashkitë e Shqipërisë. Sepse dhe ata të gënjejnë për mbështetjen; Sepse dhe ata kanë frikë po aq sa ata që gdhihen e ngrysen me ty, se fundi i diktatorëve nuk ka kursyer as shërbëtorët më të zellshëm”, shkruan ish-deputetja.
Më tej, Mehmetaj përsërit thirrjen e përdorur nga opozita që “30 qershori është dita që ndan diktaturën nga demokracia” dhe i bën thirrje kryeministrit të ruhet nga ajo cfarë mund të pasojë.
Postimi i Kejdi Mehmetajt:
Të gënjejnë Edvin!
Ata që të lexojnë sondazhet dhe të kanë mbushur mendjen se duke folur për fallxhore dhe barsaleta ke popullaritet. Të gënjejnë dhe ata që të bindin nëpër tavolina se çdo gjë është në rregull dhe se duhet të vazhdosh i qetë me zgjedhjet në 30 qershor. Të gënjejnë dhe ata që gdhihen e ngrysen me ty e nuk të thonë gjë edhe pse kanë frikë se mos i merr vala e urrejtjes popullore, që do të të fshije ty nga qeveria dhe historia.
Me tepsi e kazan, legena e fallxhorë nuk bën për të qeshur as lali Erin, dhe as kandidatet kukulla që ke vendosur nëpër bashkitë e Shqipërisë; Sepse dhe ata të gënjejnë për mbështetjen; Sepse dhe ata kanë frikë po aq sa ata që gdhihen e ngrysen me ty, se fundi i diktatoreve nuk ka kursyer as shërbëtorët më të zellshem.
Sikundër s’ka patur ushtri dhe polici, pará dhe bedelë të mbrojë të pambrojtshmin, diktatorin. Kështu që, çdo frikë e jotja e fshehur me batuta, dhe e mbrojtur me mijëra policë është e qartë për ne që na ke përballë si kundërshtarë, por dhe për ata që sot e kanë kuptuar që nuk mund të qeverisen nga politikanë të lidhur kokë e këmbë me kriminelët.
30 qershori është dita që ndan diktaturën nga demokracia. Është makthi yt më i madh, që s’ka mjekë e polici të ta heqë.
Kujdesu për veten Edvin! Ruaj ca batuta të këtij niveli për më vonë.
Ku i dihet?! Ndoshta shokëve të pak metrave vend do t’u pëlqejë të kenë gaztor një ish kryeministër!
