Partia Socialiste kërkoi marrjen e masës disiplinore ndaj deputetëve të Partisë Demokratike, Bujar Leskaj dhe Edi Paloka. Sipas dokumentit të dorëzuar në sekretari, deputetët e mazhorancës kërkojnë përjashtimin e deputetëve demokrat për 10 ditë nga komisionet parlamentare dhe nga Kuvendi. Ish-deputeti Halit Valteri ka deklaruar se në Kuvend pati disa persona që flisnin nga vendi, sepse nuk dinë të bëjnë asgjë tjetër veçse të ngacmojnë ata që flasin në foltore.
“Janë njerëz që kanë pasur mandate deputeti nga 16 vjet dhe kanë pasur në dorë punësime në administratë, kanë pasur në dorë tenderat, kanë pasur në dorë çdo lloj maskarallëku që i kanë bërë njerëzve dhe janë futur nëpër lista deputetësh duke paguar shuma të majme, dhe rrinë aty për të ruajtur interesat e bizneseve të tyre apo segmente të ndryshme të politikës”, tha Valteri.
Ish-deputeti deklaroi se nuk donte t’i dilte në mbrojtje Ramës, pasi të gjithë e njohin që të folurin publik e ka armën e tij më të fortë.
“Mendoj që u ka thënë pikë dhe presje çdo fjalë që mendojnë shqiptarët, dhe çdo fjalë që meritojnë t’ju thuash. Nëse do të isha në vendin e tij, do ti kisha thënë akoma dhe më shumë”, përfundoi Valteri.
Seanca plenare maratonë prej 28 orësh e Kuvendit të Shqipërisë përfundoi dje me miratimin e projektbuxhetit të vitit 2023, ndryshimin e akcizave, tatimin mbi vlerën e shtuar dhe për procedurat tatimore. Mazhoranca socialiste votoi me 76 vota pro 4 projektligjet e futura në rendin e punimeve.
Por, tensioni dhe acarimi pozitë-opozitë arriti kulmin në momentin kur deputetët po përgatiteshin për të votuar projektligjet. Kryeministri Edi Rama u përplas me dy deputetët e Partisë Demokratike, Bujar Leskaj dhe Edi Paloka. Debati nisi për shkak të ofendimeve të 2 ditëve më parë të shefit të mazhorancës ndaj disa prej deputetëve të selisë blu, duke i quajtur në mënyrë ofenduese “bedelë, gjel Peqini, të mbaruar, etj”.
Rama provokoi këtë herë Leskajn dhe Palokën se kishin ardhur të dehur në Kuvend. Dy deputetët demokratë iu kundërpërgjigjën, duke kaluar dhe në fyerje personale.
