Në zgjedhjet e ardhshme, Partia Demokratike do të hyjë me një ekspert financash më pak. Sherefedin Shehu, ish-deputet i kësaj partie, dhe ish-zv.ministër i Financave, ka filluar një punë të re në Irak, raporton ‘newsbomb.al’.
Ai ka marrë detyrën e ekspertit financiar të UNDP në Irak. Profesor me një ekspertizë të thellë në menaxhimin financiar, për buxhetin shtetëror dhe lokal, me profil zhvillimin ekonomik, do të japë ekspertizën e tij larg Shqipërisë. Sipas të dhënave, puna e re do të zgjasë plot 14 muaj, në Bagdat dhe Erbil.
Shehu është profesor dhe ekspert i financave dhe buxhetit, me eksperiencë 35 vjeçare akademike dhe profesionale. Ka kryer studime dhe dhënë leksione në Universitetin e Illinois në SHBA dhe ka marrë pjesë në konferenca shkencore kombëtare dhe ndërkombëtare si dhe botuar artikuj shkencorë dhe libra.
Në vitin 1998 ka marrë Certifikatën e Exelences “Who’s Who in Global Banking and Finance” dhe ka kontribuar në reformimin e finacave dhe administratës publike sipas modeleve moderne më të përparuara.
Në periudhën 2005-2009 ka kryer detyrën e Zëvendësministrit të Financave. Në këtë detyrë është emëruar pas një karriere të gjatë si profesor dhe shef i katedrës së financave publike, menaxhimit financiar, sistemit tatimor dhe auditit.
Ka punuar Drejtor i Thesarit dhe konsulent me projektet e Agjencisë së Shteteve të Bashkuara për Zhvillim Ndërkombëtar (USAID), Institutit të Shoqërisë së Hapur (OSI) në Hungari dhe Institutit të Bankës Botërore.
