Inter nuk ka ditur të përfitojë nga humbjet e rivalëve direkt dhe nuk ka arritur të sigurojë vendin e tretë në Serie A. Milan dhe Roma ishin mposhtur në ndeshjet e javës së 29, por edhe zikaltërit pësojnë disfatë në “San Siro” ndaj Lazios.
Lazio e nisi më mirë ndeshjen dhe gjeti golin e avantazhit në minutën e 13’ me Milinkovic-Savic. Serbi ka shfrytëzuar më së miri një asist të Luis Alberto-s duke shënuar një gol tepër të rëndësishëm. Inter u mundua të dilte përpara, por Lazio me kundërsulme ishte gjithmonë më i rrezikshëm.
Dukej që për zikaltrit mungonte një sulmues i mirëfilltë pasi Keita Balnde në qendër të sulmit ka hasur shumë vështirësi.
Pas pushimit Inter rrit presionin ndaj miqve, por nuk arrin të shfrytëzojë mundësitë e krijuara. Në fund, vendasit nuk e kanë merituar disfatën, por Lazio-s nuk do t’i interesojë shumë kjo gjë.
Tre pikë të arta për kryeqytetasit, të cilët tani mund të kalojnë Milan në renditje nëse fitojnë ndeshjen e prapambetur. Një hakmarrje e lacialëve për atë ndeshje të humbur në javën e fundit të kampionatit në shtëpi përballë zikaltërve, që i nxori edhe jashtë Champions League.
