Kryeministri Edi Rama është përplasur me ministrin gjerman të Shëndetësisë, Jens Spahn lidhur me një deklaratë që ky i fundit ka bërë për transmetueshmërinë e koronavirusit.
Sipas medias gjermane ‘‘BILD”, Spahn gjurmoi gjysmën e infeksioneve me koronavirus të regjistruara në Gjermani gjatë verës së kaluar, duke marrë në inspektim vizitat familjare nga emigrantët në Ballkan.
Nga inspektimi ka rezultuar se vitin e kaluar rreth 50% e rasteve të reja në Gjermani erdhën si pasojë e udhëtimeve në Ballkan e Turqi, duke shtuar se këtë vit duhen ndaluar.
“Ne mësuam nga vera e kaluar. Në atë kohë, udhëtimet jashtë vendit, shpesh vizitat te të afërmit në Turqi dhe Ballkan, shkaktuan rreth 50 përqind të infeksioneve tona të reja në faza. Ne duhet ta parandalojmë këtë këtë vit. Në këtë fazë të fundit të pandemisë, duhet të jemi vigjilentë. Çdo gjë tjetër rrezikon suksesin tonë,”– deklaroi Spahn.
Kjo deklaratë është kundërshtuar nga vetë Rama, i cili në një prononcim për median gjermane e cilësoi si një skandal.
‘Skandal që një ministër gjerman denoncon publikisht Ballkanin dhe kështu gjithashtu zhvlerëson njerëzit me një sfond migrimi. Unë nuk do të lejoj që Shqipëria të portretizohet si një zonë rreziku për udhëtimet e pushimeve, nuk ka shifra për ta provuar këtë. Një ministër gjerman i shëndetësisë duhet të kujdeset për vaksinimin e popullsisë gjermane dhe të mos zgjojë pakënaqësi stereotipike kundër Ballkanit në mënyrë që të mbrojë një rekord tdukshëm të keq.’’– tha Rama.
