Kryeministri Edi Rama ka qenë sot i pranishëm në inaugurimin e lagjes së re në Laç, e cila është ndërtuar me kontributin e shtetit turk. Pasi ka shprehur falenderimet ndaj presidentit turk për mbështetjen e tij që i ka dhënë Shqipërisë, kryeministri Rama tregoi edhe rëndësinë e miqësisë së tij me Erdogan, duke u shprehur se është nga ata liderë të cilët e mbajnë fjalën e dhënë dhe se fjalës vëllazëri i jep kuptim me vepra.
“Është e vërtetë që shpeshherë janë kurioz për miqësinë e ngushtë me presidentin turk dhe priren ta shikojnë si një çështje konspiracioni. Jo xhamitë, jo aspiratat e presidentit…Përgjigja ime është e thjeshtë, se presidenti Erdogan thotë atë që bën dhe bën atë që thotë. Nuk është e lehtë në diplomacinë e sotme që të gjesh njerëz që po-në e kanë po dhe jo-në e kanë jo. Kjo është edhe arsyeja përse unë këto episode i solla, sepse ja ku jemi sot, këtu është materializimi i të gjitha fjalëve të bukura.
Këtu mund të shikohet se çfarë do të thotë nga presidenti Erdogan kur shprehet se ‘Çfarë i dhemb Shqipërisë më dhemb dhe mua. Këtë frymë Erdogan e rrënjosur thellë në shpirtin e Turqisë dhe mënyrë se si e shikon botën dhe miqtë e saj.
Kuptimi që ai i jep me vepra fjalës vëllazëri është mishërimi i asaj që thotë profeti Muhamed, paqja qoftë me të se: Asnjë nga ju nuk beson nëse nuk dëshiron për vëllain e vet të njëjtën gjë për veten e vet’, tha më tej Rama.
Kryeministri Edi Rama ka ndarë me qytetarët një episod kur nisën punimet për rindërtimin e lagjes në Laç, dhe Turqia u goditë nga një tërmet shkatërrues. Rama tha se kishte besimin se Erdogan nuk do të tërhiqej nga fjala e tij e dhënë, dhe e mbajti.
“Unë i thash se kjo nuk do të ndodhi, jo vetëm sepse Turqia i ka mundësitë që njëkohësisht t’i bëjë të dyja, por edhe nëse nuk do i kishte mundësitë, Erdogan nuk do e linte punën për të mbajtur fjalën këtu, dhe të shkonte ta bënte atje. Erdogan jo vetëm e beson por edhe e bën realitet atë që solla këtu pak më parë, si një nga porositë e profetit “nëse nuk beson nëse nuk i dëshiron vëllait tënd të njëjtën gjë si për vetën tënde”, tha Rama.
Në ceremoninë e dorëzimit të çelësave të shtëpive të 522 banesave në Laç, kryetarja e Bashkisë së Kurbinit, Majlinda Cara, falenderoi presidentin Erdogan dhe popullin turk për ndihmën e jashtëzakonshme.
“Është nder të mirëpres presidentin Erdogan në këtë kompleks të rindërtuar nga gërmadhat që la pas tërmeti i 26 nëntorit 2019. Nuk di nëse do të gjej dot fjalët për t’i thënë falenderimet e duhura popullit turk, presidentit Erdogan dhe të gjithëve. Në emër të qytetarëve dhe banorëve të kësaj lagje të re, ju falenderoj nga zemra për bujarinë dhe solidaritetin e treguar në ditët tona më të vështira. Ka pasur një bashkëpunim të shkëlqyer të kompanive shqiptare të angazhuara në ndërtimin e kësaj lagjeje kaq cilësore me kompaninë turke, që dua t’i falenderoj për profesionalizmin e saj. Jam shumë e lumtur për të gjitha ato familje që iu riktheu shpresa dhe buzëqeshja dhe do të kenë mundësi të banojnë në këto shtëpi të pakrahasueshme me më parë”, tha Cara.
