Mjeku Genc Sulçebe, i ka mëshuar fort faktit se lufta kundër COVID 19, tashmë nuk mund të bëhet në spitale. Ai thotë se e vetmja zgjidhje mbetet parandalimi, pasi është një infeksion të cilin ne e dimë se si merret. I ftuar në Spotlight, Genc Sulçebe u shpreh se jemi ende larg imunitetit të tufës. Sipas tij, imuniteti i tufës duhet të kapë rreth 50% të popullatës.
“Kapacitetet reale pritëse të shtretërve COVID, a janë realisht për të përballuar këtë fluks të pritshëm, apo jo? Në qoftë se nuk janë, si mund të ngrihen? Këto skenare të ndryshme si janë parashikuar? Në radhë të parë duhet të kthehemi mbrapsht, të mendojmë se si të parandalojmë infeksionin. Flasim për tu shtruar në spital, por gjëja kryesore është dhe kjo i duhet sqaruar popullatës, që kjo epidemi nuk zgjidhet në spital, nuk zgjidhet me oksigjen. Zgjidhet me parandalim, sepse është një infeksion të cilin ne e dimë se si merret”, u shpreh mjeku.
Sulçebe është shprehur se Tirana shënon 20-25%, por për të mbërritur një imunitet tufe, do të ketë shifrën e 50%.
“Jemi shumë larg. Tirana tani duhet të jetë afër 20-25%. Ne Akademia e Shkencave, do të organizojmë një fazë studimore për të parë sa është realisht gjendja, por jemi akoma larg imunitetit të tufës. Imuniteti i tufës duhet të kapë rreth 50% të popullatës. Nuk mund të pretendojmë që imuniteti i tufës të arrihet përmes imunizimit natyral, por duhet ta arrijmë nëpërmjet vaksinimit, për arsye se me imunizim natyral mund të kemi shumë humbje”, shtoi ai.
