Zv.kryetari i LSI-së Luan Rama, teksa e ka konsideruar Presidentin të vetmin institucion legjitim, u shpreh se PS po tenton të godasë Ilir Metën, me synim për të rrëzuar Kushtetutën dhe Republikën e Shqipërisë. Sipas tij, po bëhet një komplot për të rrëzuar Republikën.
“Presidenti është sot i vetmi institucion legjitim. Parlamenti nuk është legjitim, drejtësia është jashtë loje, qeveria është produkt i përgjimeve. Presidenti është kryetari i shtetit, garanti i parë i Kushtetutës. Goditja e Metës synon të legjitimojë përpjekjen e nisur prej kohësh, siç e quajti Presidenti, komplot. Një pjesë e shtetit, ekzekutivi, i kundërvihet shtetit. Ka një komplot për të rrëzuar Republikën.
Shqipëria sot nuk është një vend demokratik, se nuk ka respektim të parimeve kushtetuese, nuk është vend pluralist. E vetmja mburojë e Republikës është Presidenti, prandaj duhet goditur, që të bie dhe kjo, e gjithçka të kthehet në një kolaps të madh, siç është duke shkuar, për të legjitimuar atë që po qarkullon. Sot Meta është në ushtrimin e detyrës si kryetar shteti, duke e goditur atë, rrëzohet Kushtetuta, rrëzohet Republika e Shqipërisë. Kjo tendencë do shkojë drejt kësaj”, tha Luan Rama.
