Ministrja e Shtetit për Marrëdhëniet me Parlamentin, Elisa Spiropali, ka reaguar pas miratimit të raportit përfundimtar të Komisionit të Venecias për presidentin Meta.
E ftuar në rubrikën “Opinion” në News24, Spiropali u shpreh se me shtyrjen e zgjedhjeve të 30 qershorit, Meta mori kompetencat e Kuvendit, ndaj edhe sipas saj Komisioni Hetimor do të vijojë punën e nisur për shkarkimin e tij.
“Ende nuk e kemi dokumentin por nuk besoj se ndryshon shumë, është i njëjti draft. Flet qartë përcakton shkeljet dhe na detyron ne të vijojmë me komisionin hetimor, e më pas në seancë plenare dhe gjykimin në gjykatë kushtetuese.
Edhe në kohë luftë zgjedhjet i shtyn parlamenti. Ajo që ka bërë Presidenti është një marrje e kompetencave të Kuvendit, e cila nuk ekziston në asnjë kushtetutë të botës.
Një çështje që e ngre Venecia dhe ne e kemi diskutuar është zhvillimi i 30 qershorit, për të bërë ndryshimin e madh. Venecia e thotë këtë shumë qartë, jo vetëm 30 qershori është certifikuar po edhe në të ardhmen nuk do kemi më parti që guxojnë të dalin nga sistemi, sepse sistemi nuk do ti shpërbleje. Sa do e madhe të jetë një parti mos pjesëmarrja e saj nuk është arsye për të shtyrë zgjedhjet.
Fakti që Presidenti u bë pjesë e kësaj loje politike, na çon te një problem më të madh, Presidenti jo vetëm ka shkelur unitetin e popullit, por është kthyer në drejtuesin më të egër të opozitës jashtë parlamentare.
Presidenti s’mund t’i anulonte zgjedhjet, nuk kishte asnjë konsensus. Ka marrë kompetenca të parlamentit, dhe presidenti për të gjitha këto shkelje duhet të ballafaqohet në komision hetimor e më pas në kuvend”, tha ajo.
Nga ana tjetër Spiropali foli edhe për gjuhën e përdorur nga Institucioni i Presidentit në reagimet e tij përmes zëdhënësit.
“Patjetër që do vazhdojmë, jo se kemi shqetësim me presidentin por kemi një problem të madh si parlament po edhe si shoqëri me Ilir Metën për Presidentin. Edhe reagimi i zëdhënësit ndaj kreut të grupit parlamentar të PS është i turpshëm, për të mos folur për gjuhën përdhosëse në zyrën e Presidentit. Është e papranueshme të përdorë një gjuhë kaq të padenjë duke dëshmuar se nuk është i të gjithëve dhe nuk përfaqëson sovranin. Është koha që të dalë nga zyra e Presidentit. I besojmë gjykimit të komisionit, i takon atij të gjykojë e të peshojë shkeljet. Komisioni le të bëjë punën e tij të pandikuar dhe të kalojë në parlament raportin, e më pas gjykata kushtetuese do të japë vendimin e saj”, deklaroi ministrja.
