Idriz Batha, golashënuesi i Tiranës, është i bindur se titulli e Kupa janë të bardhebluve. Ashtu si sezonin e shkuar, edhe këtë kampionat, golashënuesi i Tiranës është një mesfushor. Batha, i cili ka sezonin e parë me bardheblutë, pranon se me Luftëtarin ishte më e lehtë sesa sfida në Ballsh. Nga ana tjetër, mesfushori pohon se është i kënaqur që ka arritur tre objektiva këtë sezon, ndërsa pranon se nga Tirana largohet për një ofertë të kënaqshme nga jashtë Shqipërisë. Ja intervista ekskluzive dhënë për “Panorama Sport”…
Tani nuk mund të fshiheni. Me golin e dhjetë jeni golashënuesi i ekipit të Tiranës…
Nuk është ky qëllimi im. Ama kur vijnë të gjitha bashkë, si titulli, suksesi i ekipit dhe golat e mi, kthehet më pas në kënaqësi të trefishtë.
Këtë herë vendosët që ta mbyllnit ndeshjen shumë më shpejt se në Ballsh. Një lëvizje goxha e zgjuar?
Në fakt, dhe të jem i sinqertë, Luftëtari nuk është në lartësinë e Bylisit. Kjo situatë u përkthye te ne që e patëm më të thjeshtë punën. Nuk duhet të harrojmë se i kishim vlerësuar shumë gjatë javës. Edhe ata djem kanë merita në fushë. Për më tepër që na eci që shënuam shpejt dhe e mbyllëm po shpejt ndeshjen.
Si është të luash në orën 17:00, ndoshta në pikun e vapës së këtij qershori. Nuk do t’ju ndodhë shpesh?
Ne lojtarët e pjekur kemi njëfarë eksperience tani. Më keq është në orën 14:00 që është tmerr fare. Sigurisht që është e vështirë, por jemi mësuar.
Cilat janë ndeshjet që duhet të fitojë Tirana, për të mos rrezikuar fitimin e titullit?
Tirana duhet t’i fitojë të gjitha ndeshjet. Të gjitha, pa përjashtim, derisa ta sigurojë matematikisht titullin kampion. Deri atëherë nuk ka lëshime ndeshjesh. Deri në atë moment janë të gjitha sfida finale dhe që nuk duhet të nënvlerësohen nga ne.
I ka mundësitë dhe kthjelltësinë Tirana që të luajë dhe garojë në dy fronte, Kupë dhe kampionat?
Normalisht që po. Jemi favoritë për të fituar kampionatin, sepse jemi nëntë pikë përpara. Shumë mirë në Kupë, me një kundërshtar që mund të kalohet. Më pas do të kemi të njëjtët kundërshtarë. Dhe, pse jo, të mos ta fitojmë edhe Kupën?
Si e shikoni gjendjen e kundërshtarëve ose, më saktë, Kukësit që është skuadra, e cila pretendon për titullin?
Kukësi ka një skuadër shumë të mirë. E kam thënë edhe më parë, jo vetëm me Kukësin, por edhe me skuadra të tjera të kampionatit shqiptar, diferencat janë shumë të vogla. Normalisht që vlerësoj më shumë Tiranën dhe e shoh më lart se të gjitha skuadrat e tjera dhe këtë e kemi treguar në fushë dhe do ta tregojmë.
Deklaratat e presidentit Safet Gjici kanë qenë me tone akuzuese. Keni një koment?
Sido që të jetë, njerëzit do të flasin. Secili ka mendimin e tij në këtë punë. Ne merremi me hallet tona, nuk merremi me deklaratat e presidentëve kundërshtarë.
Një ish i Partizanit. Jeni bërë kurioz dhe keni pyetur çfarë po ndodh me miqtë tuaj te të kuqtë?
Është e vërtetë që kam shumë miq atje. Flas shpesh e qajmë hallet. Unë tek ata dhe ata tek unë. Asnjë nuk i jep dot përgjigje situatës te Partizani. Edhe ata vetë nuk e kuptojnë pse ndodhen në atë gjendje.
Kemi mësuar se keni marrë një ofertë nga Lugano. Si qëndron e vërteta e kësaj historie?
Për sa i përket së ardhmes, në kampionatin shqiptar do të luaj me Tiranën. E kam thënë shpesh që vetëm ndonjë ofertë e parezistueshme më ndan me Tiranën në fund të sezonit. Deri tani nuk ka mbërritur ndonjë ofertë nga skuadrat jashtë Shqipërisë./ PANORAMASPORT.AL
