Biznesmeni Namik Çangu u grabit dhe u torturua mbrëmjen e së shtunës nga disa persona në banesën e tij. Për shkak të goditjeve në kokë, Namik Çangu ka paraqitur probleme shëndetësore, dhe se gjatë natës ai ka pasur hemorragji.
Për shkak të përkeqësimit të gjendjes shëndetësore, policia nuk ka mundur dot ti marrë një tjetër dëshmi. Policia ka shoqëruar në komisariat personat me precedentë në fushën e vjedhjeve në zonë, dhe po punon me kamerat e sigurisë për të përfituar karakteristika të autorëve.
Maskat dhunojnë biznesmenin, i presin gishtin dhe i marrin rreth 100 mijë euro
Ngjarja e rëndë ka ndodhur në Nikël, dhe pre e grabitjes ishte Namik Çangu. Ngjarja ka ndodhur në orën 1 të natës. Dyshohet se 10 persona të armatosur dhe të maskuar kanë hyrë në banesë. Pasi kanë kyçur në një dhomë gruan dhe 4 fëmijët e biznesmenit, këtij të fundit i kanë kërkuar të hapë kasafortën.
Biznesmeni në deklarimet që ka dhënë është shprehur se nuk ka pranuar të japë të dhënat për kasafortën, dhe për këtë arsye ai është lidhur dhe është dhunuar, ndërsa më pas grabitësit i kanë prerë me gërshërë dhe një gisht.
Grabitësit kanë marrë para dhe sende me vlerë në shifrën e rreth 100 mijë eurove. Biznesmeni ka një lokal në pronësi të tij, mobileri dhe merret me agro-turizëm. Ai njihej në zonë si një person që jepte para me fajde, dhe pikërisht për këtë, policia ka si pistë hetimi lidhjet me ndonjë konflikt borxhi që ka pasur në të shkuarën.
