Kryeministri Edi Rama ka reaguar lidhur me deklaratën e liderit demokrat, Lulzim Basha për avokatin e tij mbrojtës, të cilin e ka marrë për gjyqin ndaj gazetarit gjerman.
Teksa e cilëson artist, Rama, përmes një postimi në rrjetin e tij social, i përgjigjet duke i thënë se se gjyqi do bëhet në Gjermani, ndërsa faturat do publikohen të gjitha në Shqipëri.
“Artist, ti nuk zhgënjen kurrë, je njish! Je i pandehur për qindra e mijëra euro ruse a dreqi e di ç’janë, të cilat po dreqi e di sa versione do sajosh deri në gjyq për t’i justifikuar dhe del e bilbilon për krimin që do paguaka avokatin gjerman për të luftuar lirinë e medias në Gjermani.
S’e kuptove kurrë o njish që është shah politika, jo kukamçefthi as topa luftash, po mos u mërzit! Gjyqi do bëhet në Gjermani, faturat do publikohen në Shqipëri dhe e vërteta për tërë atë çorbë të prishur që gatuat, për ta helmuar këtë vend e miqtë e tij, do dalë e plotë. Gjermanisht”, shkruan Rama.
