Përgjatë 24 orëve të fundit janë regjistruar 20 raste të reja me koronavirus në Shqipëri.
Ndërkohë së fundmi kanë dalë detaje të reja lidhur me 20 të prekurit në fjalë.
Në Durrës, numri i të infektuarve u rrit ndjeshëm me plot 12 të tillë.
Mësohet se 11 persona i përkasin të njëjtës familje dhe kanë lidhje me 71-vjeçarin e identifikuar dy ditë më parë.
Thuhet se i moshuari në Durrës ka infektuar me COVID-19 11 familjarë të tij.
Më herët, Zv/Ministrja e Shëndetësisë dhe Mbrojtjes Sociale, Mira Rakacolli tha se mbrëmjen e djeshme dhe mëngjesin e sotëm kanë ndërruar jetë edhe 2 persona të tjerë duke e çuar kështu numrin total të viktimave në 13.
“Mbrëmjen e kaluar dhe mëngjesin e sotëm kanë ndërruar jetë në spitalin Infektiv një paciente 82-vjeçare nga Tirana dhe një pacient 62 vjeçar nga Durrësi, të konfirmuar me COVID-19, me sëmundje bashkëshoqëruese. Shkon në 13 numri i personave që kanë ndërrur jetë nga COVID-19 në Shqipëri. Ministria e Shëndetësisë dhe Mbrojtjes Sociale u shpreh ngushëllimet familjeve të të ndjerëve”, deklaroi zv/ministrja.
Deri në këto momente, në Shqipëri janë testuar 1671 raste të dyshuara dhe prej tyre janë të konfirmuar pozitivë me COVID-19, 243 raste.
