Ish-ministri i Brendshëm, Saimir Tahiri, u prononcua gjatë ditë së sotme rreth vendimit të marrë nga gjykata, si dhe për ballafaqimin e tij me mediat ditën e nesërme.
Në një lidhje telefonike për emisionin “Java”, Tahiri u pyet nëse disponon përgjime të politikanëve të tjerë, të cilat mund t’i përdorë për shantazh. Ish-ministri i Brendshëm i mohoi këto akuza duke i cilësuar ato si ‘fyese’ si për të, ashtu edhe për kolegët politikanë.
Sa i përket prononcimit për mediat ditën e nesërme, nëse do të ketë materiale shtrënguese që do t’i bëjë publike, Tahiri tha se po t’i dispononte do t’i hidhte përpjetë në një sekondë.
“Është fyese të vazhdohet kjo histori që unë shantazhoj njerëz me materiale, është fyese për mua se e kam bërë detyrën me aq besim sa që nuk kam pasur kohë të merrem me këto pisllëqe. Është fyese edhe për kolegët e mi, sepse i bie që këta paskan me çfarë të shantazhohen. Të ishte kështu si thua ti, do e kisha shumë kollaj, i hidhja përpjetë në një sekondë”, tha Tahiri.
