Një tjetër gazetar u kërcënua nga pronari i një lokali, se do ti hidhte trutë në erë nëse ai raportonte ngjarjen, pas shpërthimit të një sasie eksplozivi. Kjo ngjarje e cila nuk të bën më përshtypje, pasi është simotrat e saj, referuar rastit të Klodiana Lalës e kolegëve të tjerë, është sjellë me një gjuhë të thjeshtë nga gazetari investigativ Artan Hoxha.
Nëse në rastin e Klodianës, autorët vepruan gjatë natës, në terr, duke mos lënë asnjë shenjë, rasti i korrespondentit të “Report TV”, “Fax News” dhe “News24” ishte dhe më i rëndë. Autori i ka dalë përballë dhe e ka kërcënuar me një armë.
Falë personave të pranishëm, ai është ndalur, pasi edhe mund të ndodhte ajo që nuk pritej.
Kërcënimi me jetën e gazetarit është bërë me tytën e pistoletës, ne fundin e së cilës qendronte gati një fishek që do ti mjaftonte për t’ia derdhur trutë në tokë reporterit. Këtë radhë, kërcënimi me pistoletë të mbushur drejtuar mbi fytyrën e gazetarit ka emër, ka fytyrë, ka dëshmitarë, vetëm shefi i policisë për fat të keq ka shkuar me leje.
