Kryetari i ri i Bashkisë së Shkodrës, i dalë nga zgjedhjet e 30 qershorit, Valdrin Pjetri, ka reaguar ndaj akuzave të Partisë Demokratike se ai është dëbuar dhe shpallur “non grata” për një dekadë nga Italia.
Pjetri, ka mohuar akuzat e PD duke deklaruar se nuk është ndaluar nga policia italiane dhe nuk është i dëbuar nga shteti fqinj, teksa u shpreh se do të pritet edhe kërkesa e Prokurorisë në lidhje me këtë çështje.
“Kam qenë në qendër të sulmeve nga PD. Kam bërë një reagim, kam thënë se jam mëse i hapur për çdo hetim. Shkresa e PD është në Prokurori të Përgjithshme dhe priten verifikimet. Jam mëse i hapur për çdo verifikim. Ky më shumë ngjan me një gjyq publik.
Asgjë dhe askush nuk na ndal për të punuar për Bashkinë Shkodër dhe për qytetarët. Në Itali kam shkuar disa herë, por nuk kam pas asnjë problem. Sa i përket akuzave, shkresa është në Prokurori. Duhet të presim përfundimet dhe të flasim”, ka thënë Pjetri.
